LAOAG CITY – Ginutigot ni dati a Presidential Legal Counsel Salvador Panelo ni dati a Presidente Rodrigo Duterte nga agpaidasig kas Bise Presidente inton 2028 tapno agbalin a running mate ti anakna a ni Vice President Sara Duterte.
Inbatad ni Panelo a kanayon ti panagsarsaritada iti dati a Presidente ken maysa isuna kadagiti mangilunglungalong ti Duterte-Duterte tandem inton 2028.
Kunana a binagaanna ti dati a Presidente nga agpailayon pay laeng nga umuna kas Mayor gapu ta kasapulan isuna idiay Davao ken kalpasanna inton 2028 ket agpaidasig daytoy kas Bise Presidente ti anakna a ni Vice Pres. Sara.
Inpasiguradona a no Duterte-Duterte ket agsubli amin dagiti bimmaliktad kadakuada gapu ta nabileg dagitoy.
Innayon ni Panelo, awan met ti direkta a sungbat iti singasingna ken ni Duterte imbes a binagaanna laeng isuna nga ituloy ti adbokasia a Duterte-Duterte.
