LAOAG CITY – Inlawlawag ni Engr. Fehlander Madriaga, dati a Provincial Director ti Department of Science and Technology – Ilocos Norte a ti windmill ket maysa kadagiti kadadalusan a maka-generate ti electrical energy ngem iti diesel ken ti sabali pay nga international combustion engine.
Inrakurak ni Madriaga a ti panagpuligos ti palid-palid ti maysa a windmill ket mapatayyek ti generator gapu ta ti angin ti kangrunaan a paggapoan ti enerhia a saan daytoy a maibus ken renewable, libre ken awan pulos maipaay a polusion.
Inbatadna a kas maysa a paset ti Department of Energy idi tawen 1996, inpakaammona a naiyuswat ti umuna a pilot windmill project iti Ayoyo, Capispisan iti ili ti Pagudpud no sadinno a ti kakaisuna idi a windmill ket addaan ti 10 kilowatts capacity a nakasuplay ti libre a kuryente iti lugar.
Iti nasao a proyekto, naammoan a potential area ti amianan a paset ti pagilian ken nakitaan a mabalin makaipaay ti 200 ecowatts a potential energy.
Kunana a no i-convert daytoy ket agbalin a 200 gigawatts a dakkel ti epekto iti ekonomia saan laeng ditoy Ilocos Norte no diket iti intero a pagilian a Pilipinas.
Inlawlawagna a gapu ta ti agdama ket addaan ti sumurok 300 megawatts ti aktual a magen-generate ti amin a windmill iti ili ti Pagudpud, Bangui ken Burgos.
Inpettengna a saan a marikna ti epekto ti nasao a renewable energy gapu ta saan nga agderetso ti generated power ti electrical operative no diket mapan iti national grid nga agturong iti pakabuklan ti Luzon ken nagduduma a paset ti pagilian.
Mainaig iti daytoy, kuna ni Engr. Madriaga kas idi immuna a windmill nga adda ti powerbank wenno battery-na a pagtalinaedan ti kuryente ken mai-distribute iti komunidad.
Kabayatanna, innayon ti dati a Provincial Director ti Department of Science and Technology – Ilocos Norte nga awan ti direkta nga epekto ti windmill ti problema dagiti mangngalap mainaig iti pannakaapektar ti marine life babaen ti sound disruption dagiti windmill ngem no matuloy ti pannakaikabil ti offshore windmills nangruna ti pannakaipasdek iti daytoy ket posible a mangitunda ti problema kadagiti umili.
