LAOAG CITY – Nagsapatan ni Rapper-turned-politician Balendra Shah kas Prime Minister ti Nepal kalpasan ti landslide victory iti kaunaan nga eleksyon iti pagilian sipud nangipatungpal ti nadamsak a tignay-protesta dagti agtutubo.
Ti panagballigi ti agtawen ti 35 a dati a rapper ket maysa a napateg a panagbalbaliw iti politika idiay Nepal.
Maipalagip a nakagun-od ti layos a botos ni Shah gapu kadagiti inkari na a dakkel a panagbalbaliw a nangipaay ti dakkel a namnama kadagiti botante a makapungpungtot iti korapsyon, nepotismo ken panangiwanwan kadagiti mapilpili laeng nga indibidual.
Sakbay a nagtakem ni Shah a mabigbig kas Balen ket nangiparuk-at ti kanta a positibo maipanggep iti masakbayan ti Nepal.
Ibilang met dagiti supporters na a ni Shah ti simbolo iti panagbalbaliw iti Nepal.
Nupay kasta, saan latta met a maliklikan nga adda dagiti mangkwestyunar no ti dati a rapper ket kabaelan na nga ipatungpal dagiti inkari na a dakkel a panagbalbaliw para iti nasao a pagilian.
