LAOAG CITY – Pinasingkedan ni Liberal Party spokesperson ken dati a Senador Leila de Lima nga awan ti plano na nga agkandidato iti 2025 midterm elections.
Segun iti dati a Senador, awan ti planona nga agkandidato iti aniaman a posision iti eleksion inton sumaruno a tawen gapu ta agtalinaed a naikumit kadagiti dadduma pay a prioridadna a pakairamanan ti panangtulongna iti partidona, adbokasia ken sumagmamano nga isyu a mainaig iti personal a biagna.
Inaramid ni De Lima ti statement iti tengnga ti sumagmamano a sayangguseng a mabalin a baliwanna ti panunotna gapu ta adda pay 3 a bulan sakbay ti opisial a panawen ti panangipila certificate of candidacy.
Kabayatanna, maipalagip nga immunan nga inbatad ti dati a Senador a plano ti kampona ti mangipila iti counter-charge kontra kada dati a Presidente Rodrigo Duterte ken dati a Justice Secretary a ni Vitaliano Aguirre gapu iti pinarparbo ken politikal a kaso kontra kenkuana mainaig iti illegal a droga.
