LAOAG CITY – Inlawlawag ni Barangay Chairwoman Val Rarangol iti Barangay Nagpatpatan, Solsona, Ilocos Norte no apay a saanna nga inikkan ti barangay clearance ni dati a Barangay daycare worker Carmelita Ferrer.
Inpetteng na a saan a kwalipikado ni Ferrer a makaala ti barangay clearance ken inikkat na kas mangisuro iti daycare gapu ta ado ti liway na kas ti maipagarop a panangala na kadagiti donasyon iti daycare gapu ta isuna ti nagsulisit ken ti panangpuur na kadagiti files dagiti ubbing.
Kuna na pay nga awan ti karbengan ni Ferrer a mangala kadagiti donasyon gapu ta saan a naited dagidiay no saan a para kadagiti adalan na.
Malaksid ti daytoy, inbatad na a masapol koma nga inturnover na dagiti files dagiti ubbing iti nangsukat kenkuana.
Segun kenkuana, kayat na pay laeng a makasarita iti personal ni Ferrer tapno ilawlawag na dagiti inaramid na ken saan a rumbeng a maysa nga ubing ti ibabaon na tapno mapan mangala ti barangay clearance na.
Nagballaag ti kapitana a no saan a mapan agpalawag ni Ferrer ket possible nga isaklang na daytoy.
Inpetteng ni dati a Barangay daycare worker Carmelita Ferrer iti Barangay Nagpatpatan, Solsona, Ilocos Norte a naminduan a daras a napan iti balay ni Barangay Chairwoman Val Rarangol ngem kanayun nga awan ti nasao nga opisyal.
Inlawlawag pay ni Ferrer ti isyu a pinuuran na dagiti files dagiti ubbing ken ti panangala na kadagiti sumagmamano a donasyon iti daycare.
Inadmitir na ti panangala na kadagiti sumagmamano a donasyon iti daycare ngem saanna a pinuuran dagiti files dagiti ubbing.
Nupay kasta, inpasingked na a no malawlawag ti alegasyon kenkuana a makalawas a saan a napan nangisuro ket isubli na amin dagiti innala.
Inbatad na a saan a pudno a makalawas a naglangan iti trabaho na ken idi nagbakasyon ket nagpakada daytoy.
Kabayatanna, inbatad ni Ferrer a nakasagana a makisarita ken n Rarangol ngem masapol nga adda dagiti kadwa na a mapan makisango.
Indiaya ti Bombo Radyo nga iti mismo estasyon ti pagsaritaan da ket immannugot ni Ferrer idinto a saan a pimmabor ti kapitana gapu ta para kenkuana ket nakababain ken agparang a saan da a kabaelan a solbaren daytoy iti mismo a barangay da.
