LAOAG CITY – Nagballigi dagiti kameng ti Philippine National Police (PNP) ken PDEA iti inyuswat da a drug buy-bust operation iti Barangay 40, Balatong ditoy ciudad ti Laoag.
Nabigbig ti suspek a ni Joel Agno Domingo alyas Bobby a taga ciudad ti Batac.
Natiliw ni Domingo kalpasan a linakwan na ti nagpammarang a poseur buyer ti maysa a sachet a naglaon ti maipagarop a shabu ken agbalor ti 500 a pisos.
Malaksid iti daytoy, nakakumpiskar pay dagiti otoridad iti uppat a sachet a naglaon met laeng iti maipagarop a shabu, kasta met iti inusar ti suspek a motorsiklo nga awanan ti plate number ken sumagmamano a drug paraphernalia.
Mapatta-patta nga agdagsen ti 1.4 a gramo dagiti maatap a shabu a naala iti ikot ni Domingo ket agbalor dagitoy iti 14 a ribo a pisos.
Naamoan a ti suspek ket dati a drug surrenderer idiay ciudad ti Batac.
