LAOAG CITY – Inpakaammo ni Mr. Orlando Marquez, Presidente ti Liga ng Transportation at Operator ng Pilipinas a mangididiaya ni dati nga Ilocos Sur Gov. Chavit Singson ti electric jeepney kadagiti Public Utility Vehicles drivers.
Segun kenkuana, napintas daytoy gapu ta pinadasda dagiti sumagmamano nga electric jeepney kaduana da Department of Transportation Sec. Jaime Bautista ken dadduma pay nga opisial.
Inbatadna a dumanon iti 500 nga unit iti kada bulan no sadinno ket 1.2 milyon a pisos ti balor iti Class 2 no maidasig kadagiti dadduma nga agbalor iti 3.2 milyon a pisos.
Mainaig iti daytoy, kunana a kalikagum ni Singson a mangipasdek ti solar electric charging station ditoy pagilian tapno matulungan dagiti maseknan a driver kas nasapa a pamaskuana kadagitoy.
Naammoan a dagiti unit ket manipud iti maysa a factory idiay Korea a kukua mismo ni Singson.
Innayonna nga adda ti maiyuswat a taripnong maipanggep iti daytoy a programa a maidiaya kadagiti driver ti pampasahero a lugan para iti napinpintas a pannakaipatungpalna.
