LAOAG CITY – Nangisubmitir ti defense team ni dati a Presidente Rodrigo Duterte ti baro a medical records iti International Criminal Court (ICC) mainaig iti agdama a mental state ti dati a Presidente.
Iti naisubmitir a medical record ti depensa, kumkumpirmarenna daytoy nga addaan ti “cognitive impairment” ti dati a Presidente.
Basar iti dokumento, inprisentar ti defense ti nasao a submission iti Pre-trial Chamber idi Hulio 18 mainaig iti kapada nga isyu tapno ipaay iti Chamber ken maikabil iti rekord ti kaso ti baro a medical records a naawatda iti kallabes.
Inlawlawag ti depensa nga inwayat ti nasao nga evaluation ti maysa a medical professional a dinutokan mismo ti medical officer ti International Criminal Court Detention Center a mangkumkumpirmar iti maipagarup a nabayagen nga atap nga addaan ti cognitive impairment ti dati a Presidente.
Inbatad ni lead counsel Nicholas Kaufman, naaramid ti nasao a submission nga addaan ti urgency gapu iti pakainaigan ti nasao a medical records iti isyu no kabaelan kadi wenno saan ti dati a Presidente a sumango iti trial.
Daytoy ket kagiddan pay ti dati nga urgent request tapno isuspenso ti panagdesision iti interim release agingga iti amin a medical records pakairamanan ti neuropsychological evaluation ket naisubmitir iti Korte.
Kabayatanna, gapu iti rimmuar a findings, kuna ti depensa a ti cognitive impairment ti dati a Presidente ket umdas a pangibasaran tapno iwayat ti panangtingiting iti nasao nga isyu sakbay nga ituloy ti confirmation hearing.
Naammoan a pormal a naiserrek dagiti nasao a dokumento iti case record idi Setiembre 29.
