LAOAG CITY – Inpetteng ti kampo ni Vice President Sara Duterte a saan da a pagbayagen wenno itantan ti impeachment trial iti Senado.
Inbatad ni Atty. Michael Poa, ti pannakangiwat ti legal team, a dagiti panangkontra ti depensa ket lehitimo ken ar-aramiden da laeng dagiti makita ti depensa a kasapulan, maikontra kadagiti agwarwaras iti online kalpasan ti panangkontra ni Atty. Carlo Joaquin Narvasa.
Inlawlawag ni Poa, a kalikagom met ti partido da a malpas a dagus ti trial tapno saanen nga agbayag ti panagdengngeg iti kliyente da ken mamati nga uray iti biang ti prosekusyon ket kayatda a malpasen ti panangusig iti kabiitan a panawen.
Kabayatanna, segun ken ni Trial Presiding Officer Francis Escudero, mabalin a maipaalisto ti proseso kadagiti sumarsaruno nga aldaw, nga imunan a mapatta-patta nga agpaot ti agingga iti walo a bolan tapno makompleto ti 92 trial days.
