LAOAG CITY – Inrakurak ni Dr. Thong Amino manipod iti Bangsamoro Autonomous Region in Muslim Mindanao a nasurpresa da iti nabara ken naragsak a panangsarabo kadakuada iti panagturong da ditoy Ilocos Norte para iti Palarong Pambansa 2025.
Ti delegasyon manipod iti Bangsamoro Autonomous Region in Muslim Mindanao ket agtalinaed iti Balatong Integrated School ken Balacad Elem School ditoy ciudad ti Laoag.
Nagyaman pay ni Amino kadagiti kameng ti Philippine National Police ken dagiti opisyal ti barangay gapu iti naiget a panagbanbantay da kadakuada tapno masigurado ti seguridad ken kinatalged da.
Mainaig iti daytoy, inbatad ni Amino a saanda a ninamnama ti kinapintas iti Ilocos Norte.
Innayon na a maminsan da laeng a makapasyar iti probinsya isut gapuna a kayatda a gundawayan tapno mapasyar dagiti agkakapintas a buya ken lugar.
Kabayatanna, mangnamnama ni Amino nga iti Palarong Pambansa 2025 ket ado dagiti maiyawid da a medalya kangrunaan na ti balitok.
