LAOAG CITY – Inrakurak ti Department of Energy a manamnama ti dakkel a kissay iti presio iti petrolyo inton sumaruno a lawas kalpasan ti nagsasaruno a panagngato ti presio kadagiti naglabas a lawas gapu iti gubat iti Middle East.
Inbatad ni Energy Secretary Sharon Garin, posible a bumaba ti presio ti diesel ti P20.89 iti kada litro, gasoline P4.43 iti kada litro ken kerosene ti P8.50 iti kada litro nga ipatungpal ti rollback manipud inton Abril 14 agingga Abril 20.
Inlawlawagna a ti patta-patta ket maiyallubog iti average ti international a presio ti langis iti napalabas a lima nga aldaw maidasig iti presio iti napalabas a lawas.
Kunana a nupay mabalin nga agbaliw ti aktual a presio iti kada gasolinaan, daytoyen ti manamnama a minimum a panagkissay iti presio.
Dakkel a nam-ay ti manamnama a panagbaba ti presio nangruna iti sektor ti transportasion, agrikultura ken panagkalap a direkta nga apektado ti nangato a presio ti krudo.
Manamnama pay a makatulong daytoy tapno apagapaman a maipababa ti gastos iti produksion ken presio dagiti kangrunaan a magatgatang.
