LAOAG CITY – Ad-adda pay a pinaigetan ti Department of Agriculture (DA) dagiti addang tapno maisubli iti normal ti populasion dagiti baboy iti pagilian ken masigurado ti natibker a suplay ken presio ti karne iti merkado.
Inbatad ni Agriculture Secretary Francisco Tiu Laurel Jr. agtultuloy nga ipatpatungpal ti ahensia ti naig-iget a biosecurity measures ken science-based repopulation programs.
Gagem daytoy a malappedan ti panagwaras ti African Swine Fever (ASF) ken mapaalisto ti panagbangon ti industria.
Ikagkagumaan ti gobierno a mabalanse ti panangpapigsa ti produksion ti hog sector kabayatan a protprotektran ti pagsapulan dagiti agtartaraken ti baboy.
Basar iti datos ti Philippine Statistics Authority (PSA), bimmaba iti 8.75 milyon nga ulo ti swine inventory ti pagilian idi 2025 manipud iti 9.57 milyon iti napalabas a tawen.
Mamati ti Department of Agriculture a napateg ti napaspas a panagbangon ti hog industry tapno mapapigsa ti food security ken makatulong iti panagkontrol iti panagngato ti presio ti taraon iti pagilian.
