LAOAG CITY – Inbalakad ti Department of Education (DepEd) iti amin a pagadalan iti pagilian nga iyuswat laengen iti indoor ti end-of-school-year rites kas ti graduation ken moving-up ceremonies.
Ita nga school year 2023-2024 ket iyuswat ti amin nga end-of-school-year rites iti aniaman a petsa manipod Mayo 29 agingga iti Mayo 31 gapu ta daytoy ti naipalaon iti Department of Education Memorandum No. 023 series of 2024.
Nailanad iti memorandum nga ibalbalakad ti Department of Education ti pannakaiyuswat dagiti nasao a seremoniya iti indoor venues nga addaan ti naurnus a bentilasyon wenno iti covered courts tapno maliklikan ti exposure iti nakaro a kinabara ti panawen ken masigurado ti kinatalged ken maprotehiran dagiti agad-adal, mangisursuro ken attendees.
Inbatad ti Department of Education a masapol a liklikan nga iyuswat ti graduation wenno moving up ceremonies iti oras a nakabarbara ti temperatura ken aramiden laengen daytoy a simple ngem napnuan kaipapanan.
Inpetteng pay ti ahensya a saan a rumbeng nga inkapilitan ti panagatendar kadagiti non-academic activities kas ti field trips, film showings, Junio-senior Promenade ken dadduma pay nga school events.
Iti met pampubliko a pagadalan, kuna ti Department of Education a dagiti magastos kadagiti aktibidad iti end-of-school-year rites ket masapol nga ipataw iti Maintenance and Other Operating Expenses account ngem masapol a subject iti existing guidelines.
Nagballaag ti ahensiya nga awan ti mangisursuro wenno personnel ti Department of Education ti rumbeng nga agkolektar ti aniaman a klase ti kontribusyon wenno fee para iti Graduation wenno moving up ceremony.
