LAOAG CITY – Makibinbinnulig ti Department of Health (DOH) kadagiti lokal a gobierno a kadawyan a maap-apektaran iti nakaro a layus kagiddan ti iduduprak ti bagyo Nika kas maibasar iti direktiba ni Presidente Ferdinand Marcos Jr.
Segun iti ahensya nangrugi dan a nagmonitor sipud pay idi kalman no sadinno a prioridadda nga ibakwit dagiti adda iti highest risk, pakairamanan dagiti masikog a babbai, dagiti agpaspasuso ti ubbing, dagiti nataengan, dagiti addaan iti depekto ken dagiti masakit.
Mainaig iti daytoy, naibilin kadagiti amin nga health facilities nga ipangpangrunada ti panag-admit kadagiti masikog a babbai tapno maliklikan ti komplikasion.
Iti palawag ni Health Secretary Ted Herbosa, nakasagana dagiti health facilities ken ospital ti Department of Health a mangipasigurado iti agtultuloy a pannakaipaay ti serbisio iti laksid ti pangta ti bagyo.
Kabayatanna, nagpalagip ti sekretario ti publiko nga agbalin nga alerto, isagana ti Go Bag para iti tunggal pamilia kas iti first aid kits, survival kits ken dadduma pay a napateg a personal items ken suroten dagiti pakaammo dagiti otoridad maipapan iti panagbakwit.
