LAOAG CITY – Masapol a simple ngem napnuan kaipapanan ti maisayangkat a closing exercises iti amin a pampubliko a pagadalan ditoy probinsya.
Daytoy ti inpaganetget ni Atty. Donato Balderas Jr., Schools Division Superintendent ti Department of Education – Ilocos Norte.
Kuna pay ni Balderas a ti pondo nga usaren para iti maisayangkat a programa ket maala manipod iti School Maintenance and Other Operating Expenses (MOOE), no sadinno a daytoy ti rumbeng a maamoan dagiti nagannak.
Inbatad pay ni Balderas a rebbeng laeng nga adda ti maisayangkat a closing exercises ngem saanna a kayat a sawen a masapol nga aggastos ti dakkel dagiti nagannak.
Inpalagip ni Atty. Balderas a nabayagen a maipatpatungpal ti “No Collection Policy”, ngem no bilang adda dagiti nagannak nga agboluntaryo laeng a mangipaay ti tulong wenno pagmeryenda iti pagadalan ket saan a maipawil.
Mainaig iti daytoy, kuna ni Balderas nga iti pannakaisayangkat ti closing exercises ket napinpintas koma metlaeng no dagiti alumni wenno naggapo a mismo ti pagadalan ti maala a guest speaker tapno isu ti pagsarmingan dagiti agad-adal tapno agballigi met iti biag.
Kabayatanna, inpakaammo ni Balderas a no saan a kabaelan ti maysa nga ubing iti mapan iti nangatngato a tukad ket masapol nga agtalinaed iti ayanna a grade level, ngem saanna a kayat a sawen a nabaybay-an dagitoy ngem ketdi makita no ania ti kapintasan nga interbension kadakuada.
