LAOAG CITY – Agpanpanawagan ti Department of Foreign Affairs (DFA) iti China a siguradoen ti kasasaad ken karbengan ti sumurok 100 a Pilipino a naarestar gapu iti maipagarup nga illegal a panagtrabaho wenno panagtalinaed iti pagilian.
Kinumpirmaran ti Department of Foreign Affairs (DFA) ti napalawa a panangarestar kalpasan nga inbatad ti Chinese Foreign Ministry a mangiwayatda ti tignay kontra iti sumurok 100 a Pilipino a maipagarup nga illegal nga agtrabtrabaho iti China.
Kuna ti ahensia a bigbigbigen ti pagilian ti karbengan ti China nga ipatungpal ti bukudna nga immigration laws ngem rumbeng a suroten ti umno a proseso.
Nupay kasta, nagkiddaw ti ahensia kadagiti otoridad ti China a protehiran ti kasasaad dagiti Pilipino a nakabalud ken insigida nga ipakaammo iti Philippine Foreign Service Posts ti pannakaibalud dagitoy.
Basar iti Department of Foreign Affairs (DFA), maiyataday daytoy iti Vienna Convention on Consular Relations ken iti 2013 Philippines-China Consular Agreement.
Makikoordinar ti Department of Foreign Affairs (DFA) iti Philippine Embassy iti Beijing ken dagiti Philippine Consulate-General iti China tapno maammoan ti eksakto a bilang dagiti naarestar a Pilipino ken dagiti rason ti pannakaibaludda.
Tingtingitingen ti ahensia no nasurot ti legal ken consular procedures ti inwayat a pannakaarestar dagiti Pilipino.
Kabayatanna, naiget a binabalaw ni Defense Secretary Gilbert Teodoro ti panangarestar ti China kadagiti Pilipino ken inawaganna daytoy kas “blackmail” ken kinondenarna ti maipagarup a panangusar kadagiti Pilipino kas wagas tapno makibiang iti proseso ti panangipatungpal ti linteg ti Pilipinas.
