LAOAG CITY – Agkiddaw ti Department of Information and Communications Technology ti P18 billion a pondo iti salinong ti rakurak a P7.2-trillion national budget para iti 2027 para iti pannakaipalawa ti digital services ken connectivity programs ti pagilian.
Iti kiddaw a pondo ti nasao nga ahensia, P2.7 billion para iti e-governmnet program, pakairamanan ti cloud hosting, cybersecurity ken system integration para iti eGovPH application.
Mainaig iti daytoy, babaen ti one-stop platform, mabalin nga agurnong dagiti Pilipino ti digital IDs, ag-apply ti trabaho ken agkiddaw ti medical assistance.
Segun kadakuada, nakairekord ti eGovPH app ti sumurok 61 million downloads ken sumurok 900 million transactions, no sadinno ket makita ditoy ti sumurok 1,300 government services iti intero a pagilian.
Inbatad ti ahensia a no maaprubaran ti pondo ket rugianda ti panangipatungpal ti eGovAI, maysa nga artificial intelligence layer para iti automated document processing.
