LAOAG CITY – Kalikagum ni Mayor Albert Chua iti Siudad ti Batac ti in-inoten a pannakaipatungpal ti digitalization iti lugarda.
Segun kenkuana, manarimaan nga ad-adalenna ti pannakaipalawa ti interconnectivity no sadino a mabalinen nga agkaykaysa dagiti nagduduma a Telecommunications Company tapno ad-adda pay a mapapigsa ti koneksyon nangruna kadagiti adda iti nasulinek a lugar.
Inbatadna a napintas daytoy a wagas tapno ad-adda pay a naparpartak ti pannakaipadanon dagiti ipormasion ken makamatan dagiti dadduma a lugar pakaseknan iti progreso ti panagaramat ti baro a teknolohia.
Inadmitirna a saan a kaskarina ti pannakaipakat ti nasao a pagannurutan ngem bayat ti panagtulid ti panawen ket main-inot a masursuro dagiti umili no sadino immunan a naipatungpal ti online payment.
Inlawlawagna a dakkel a tulong daytoy para iti pannakaiyalisto dagiti pannakaiproseso dagiti application ken registration online tapno saanen a kasapulan pay a mapan iti personal kadagiti pangopisinaan ti lokal a gobierno.
Kabayatanna, mamati ni Mayor Chua a ti panagusar ti baro a teknolohia ti makatulong ti al-alisto a panagdur-as ken nadaras a panangipadanon kadagiti serbisio kadagiti maseknan nga umili.
