LAOAG CITY – Inwayat ti Department of the Interior and Local Government (DILG) ti baro a nalawa a manhunt kontra iti negosiante a ni Charlie “Atong” Ang nga agtultuloy nga aglemlemmeng kalpasan a naisyuan ti warrant of arrest mainaig iti kaso kadagiti mapukpukaw a mammallot.
Inbatad ni Interior Secretary Jonvic Remulla a maitugot iti operasion ti sibubukel a security apparatus ti gobierno.
Inlawlawagna a makikoordinar ti gobierno kadagiti international ken multinational intelligence agencies tapno mapaalisto ti pannakabiruk ken ni Ang.
Kinumpirmaran ni Remulla ti panagusar ti baro a teknolohia kas ti satellites.
Manarimaan metten ti pannakikoordinar dagiti otoridad iti Interpol idinto a nakasaganan ti Department of Foreign Affairs ti template para iti red notice application a manamnama a maipasa inton sumaruno a lawas iti babaen ti Philippine Center on Transnational Crime.
Kabayatanna, agsukat ti Philippine National Police iti panagusar ti drones nga imbes a dagiti helicopters nga agbalor ti sumurok-kumurang P50,000 iti kada oras.
Basar iti Department of the Interior and Local Government, nalaklaka ti drones nga umabot iti P3,000 iti kada oras.
Manamnama nga ad-adda pay a paigetan ti manhunt kadagiti sumaruno a lawas iti koordinasion dagiti lokal ken internasional nga ahensia tapno mabirukan ni Ang.
