LAOAG CITY – Nangipeksa ti kinasagana ti Department of the Interior and Local Government kaduana ti Philippine National Police tapno siguradoen ti kinatalged ken kinaurnos a pannakaisayangkat ti Trillion Peso March, inton bigat, Nobiembre 30.
Pinatibker ti ahensia ti commitment-da a protektaran ti tunggal umili, pagtalinaeden ti kinaurnos ken siguradoen nga agbalin a natalged ti nalawa a rally.
Iti maysa nga statement mainaig iti security preparations ti Department of the Interior and Local Government, inbatadna a mangi-deploy ti nailian a pulisia ti umdas a kapulisan kadagiti kritikal a lugar para mabantayan ti kinaadu dagiti tattao, marespondean dagiti emergency situation ken agtalinaed ti taray ti trapiko.
Naiget a maobserbaran ti maximum tolerance ken tapno masigurado ti kinatalged ti publiko, sinuspenso ti permit iti panangitugot kadagiti paltog idiay Metro Manila mangrugi ita nga aldaw ti Sabado agingga inton Lunes, no sadinno a ti laeng law enforcement personnel nga agserserbi kadagiti official duties-da ti mapalubosan a mangitugot ti paltog iti nasao a panawen.
Daytoy ket maiyataday iti pammilin ni Presidente Ferdinand Marcos Jr. tapno masigurado ti kinatalged ti publiko kabayatan nga ipatpatungpal ti constitutional right dagiti Pilipino para iti panangisayangkat ti nakappia a panagtitipon.
Inallukoy ti Department of the Interior and Local Government dagiti amin a makipaset iti rally nga ipeksa ti karebbenganda a responsable, suroten dagiti pagannurotan manipud kadagiti otoridad ken makikaysa para iti naurnos ken natalged a tignay protesta.
