LAOAG CITY – Dinosdosena a pagilian ti nangipeksa ti suporta na iti International Criminal Court (ICC) kalpasan a pinatawan ni US President Donald Trump ti sanctions dagiti staff na.
Ti majority a miembro iti estado a pakairamanan ti United Kingdom, Germany ken France ket inpetteng da a ti International Criminal Court ket isu ti “vital pillar” iti international justice system”.
Immunan nga inrakurak ni Trump ti panangipataw na ti sanctions itiu International Criminal Court kalpasan ti panagtaripnong da ken ni Israeli Prime Minister Benjamin Netanyahu, ti kaunaan a foreign leader a nangbisita kenkuana sipud nagsubli iti turay.
Maipalagip nga iti napalabas a tawen ket nangisyu ti International Criminal Court iti arrest warrant kontra ken ni Netanyahu gapu iti maipagarop a war crimes iti Gaza, banag a naglikudan ti Israel, kasta pay ti Hamas commander.
Daytoy ti rason a kinondenar ti Estados Unidos ti International Criminal Court gapu ta ibilang na ti nagbalin nga addang na kas “shameful moral equivalency” iti nagbaetan ti Israel ken Hamas.
Agpada pay ti Estados Unidos ken Israel a saan a mangbigbig iti otoridad ti International Criminal Court, ti kakaisuna a global court a mangipatpataw ti pannusa kadagiti indibidual para iti genocide, crimes against humanity ken war crimes.
Ti International Criminal Court ket addaan ti 125 a member states iti intero a lubong, pakairamanan ditoy ti United Kingdom ken ado nga European nations.
