LAOAG CITY – Dinosdosena a tattao ti mapagam-amkan a pimmusay kalpasan a narpuug ti two-storey Islamic boarding school iti ili ti Sidoarjo idiay Indonesia.
Basar iti report, addan ti lima nga estudyante ti kumpirmado a natay idinto nga agarop a 100 a sabsabali dagiti nasugatan ken 59 dagiti mapukpukaw.
Naamoan a ginasut nga estudyante a kaadoan ket lallaki ti adda iti uneg ti nasao a pasdek idi mapasamak ti insidente.
Iti agdama agtultuloy ti rescue operations ken daytoy ket dakkel a karit para kadagiti rescuers gapu iti saan a kinatalged ti pasdek.
Inbatad ti disaster mitigation agency (BNBP) a dagiti rescuers ket agus-usar ti thermal drones nga isu ti pag-detect da no adda pay dagiti sibibiag a tattao manipod kadagiti nabunbunton a batbato.
