LAOAG CITY – Inlawlawag ni Father Melchor Palomares iti Diocese of Laoag nga amin a tattao ket mabalin nga agbalin a santo.
Segun kenkuana, adda dagiti naideklarar a santo a dati a managbasol isut gapuna nga ad-adda pay a dakkel ti posibilidad na nga agbalin a santo ti maysa nga ubing a nadalos ti puso na, managkararag ken kanayun a mapan makisimba a kas kenni Niña Ruiz-Abad a taga Sarrat, Ilocos Norte.
Inbatad ni Father Palomares a ti maysa kadagiti ar-aramiden da ket aw-awisen da dagiti addaan ti sakit a mapan da aprusan dagiti nakali a nabatbati a bangkay ni Abad.
Mangnamnama ni Palomares nga adda ti mapasamak a milagro ket agimbag dagiti addaan ti sakit a makaiggem wenno makaaprus kadagiti nabatbati a bangkay ni Abad kas kadagiti tulang na gapu ta maysa daytoy kadagiti pagibasaran no ti maysa a tao ket rumbeng a maideklarar kas santo wenno saan.
Innayon na a dagiti nabatbati a bangkay ni Abad ket saanen a sanikua ti pamilya na no di ket naminpinsanen a naipaima iti simbaan katolika.
Immunan a kinumpirmaran ti Catholic Bishops’ Conference of the Philippines (CBCP) nga iproseso ti Diocese of Laoag ti panagbalin ni Abad kas kaubingan a santo iti pakasaritaan ti Pilipinas.
Segun kenni Bishop Renato Mayugba, inpakita ni Abad ti kababalin na a maibilang a naisangsangayan para iti edad na.
Kunana pay a nagibunbunong idi ni Abad kadagiti rosariyo, Bibliya, prayer books, holy images, ken dadduma pay a religious items.
Inbatad ni Mayugbay nga iti laksid ti ababa a panagbiag ni Abad, nangibati daytoy ti dakkel nga impact ka dagiti tattao a nasagid ti biag da iti nauneg a pammati na iti Diyos ken ti acts of charity.
Ni Bishop Mayugba ti nagkiddaw tapno malukatan ti posible a panagbalin a Santo ni Abad.
Inlawlawag met ti Catholic Bishops’ Conference of the Philippines a mabalin nga aboten iti sumagmamano a tawen sakbay ti desisyon ni Rome seknan iti beatification ken canonization ni Abad.
Ni Abad ket naiyanak ken dimmakkel iti Quezon City ngem immakar ti pamilya na iti ili ti Sarrat ditoy Ilocos Norte idi Abril 1988.
Maipalagip nga immunan a naideklarar a Santo dagiti Pilipino a da San Lorenzo Ruiz ken San Pedro Calungsod.
