LAOAG CITY – Nagpanawagan ti World Health Organization (WHO) ti ceasefire iti daya a paset ti Democratic Republic of the Congo (DRC) tapno malappedan ti panagwaras ti Ebola kabayatan nga agtultuloy ti riribok iti rehion.
Basar iti World Health Organization, kimmaro ti outbreak ti Ebola iti baet ti agtultuloy a rinnupak isut gapuna no apay nga agdudupudop dagit nagibakwit kadagiti evacuation ken displacement camps no sadinno nga al-alisto ti panagwaras ti sakit.
Inbatad ni World Health Organization Director-General Tedros Adhanom Ghebreyesus a ti situasion iti daya a paset ti Democratic Republic of the Congo ket nakaro a naapektaran ti gubat ken sakit a marigrigatan dagiti health worker a makaipaay ti tulong gapu iti riribok.
Kunana a saan nga agbalin nga epektibo ti panangsungbat ti outbreak no agtultuloy ti panagbomba ken rinnupak isut gapuna nga agpanpanawagan isuna iti amin a maseknan a mangipatungpal ti insigida a ceasefire.
