LAOAG CITY – Inpetteng ni Mr. Danny dela Rosa, board of director iti discolandia iti Brgy. 1 ditoy siudad ti Laoag a manipod nangrugi ti pandemiya ket awan ti agop-operar iti nasao a lugar.
Daytoy ket kalpasan nga adda dagiti alegasyon nga adda ti iligal nga operasyon ti discolandia ken maipagarup a sumagmamano nga empleado ti DPWH 1st engineering district a nagpositibo iti covid-19 ti mapmapan iti lugar rason nga adda ti naka-isolate a positibo antigen test iti nadakamat a lugar.
Inlawlawagna ni dela Rosa a dimmalan iti antigen test ti maysa nga agpapaay iti discolandia gapu ta maitudtudo a nakapulapol dagiti inhinyero ti DPWH.
Nu pay kasta, inkalintegan na a ti panagpositibo iti antigen test ti maitudtudo a nakapulapol dagiti empleado ti DPWH ket nairanrana laeng nga addaan ti sintomas ti virus isut gapu na a positibo iti antigen pakairamanan ti maysa met laeng nga agpapaay iti discolandia.
Inpetteng ni dela Rosa a posible a pammerperdi laeng dagiti akusasyon a maibatbato kadakuada.
Immuna iti daytoy, inbunannag ni dela Rosa a maipawil ti operasyon ti discolandia kangrunanaan na iti panagpastrek ti customers gapu ta daytoy ti naiget a pammilin dagiti opisyal ti barangay kangrunaan ni Gov. Matthew Manotoc.
Innayun na a nu aglabsing da iti pagalagdan ket posible nga ad-adda a saan da a mapalubusan nga agoperar iti masangoanan.
Kabayatanna, inbatad ni Brgy. Kagawad Hassan Panaraag iti Brgy. 1 ditoy siudad ti Laoag nga awan ti operasyon ti discolandia iti nadakamat a barangay.
Kuna na a basar iti panagmon-monitor da ket awan met dagiti agturturong iti nasao a lugar gapu ta sipod nangrugi ti pandemiya ket kanayun a marondaan ti discolandia kas mandar ti kapitan iti nasao a barangay.
Inbatad na a nu adda man makita da a sabsabali a langa ket maireport a dagus iti barangay ngem agingga ita ket awan met pay naaw-awat da a report.
Immuna iti daytoy, inpakaammo nga addan ti panag-inspeksyon dagiti kameng ti PNP nga indauloan ti hepe a ni PLt. Rafael Lero.
Kuna na a bayat ti panag-inspeksyon da ket nakita nga awan dagiti agop-operar a pasdek iti dicolandia ken arigna saan a nadaldalusan gubuay ti nabayag a saanen a panagoperar dagitoy.
Nu pay kasta, inbatad na a nga agtultuloy ti naiget a pannakamonitor ti discolandia kangrunaan na dagiti naka-isolate a nakitaan ti sintomas ti covid-19.
