LAOAG CITY – Nakastreken iti semifinals ti Australian Open ni Serbian tennis star Novak Djokovic.
Daytoy ket kalpasan ti naisangsangayan a panangabak kontra ken ni Carlos Alcaraz iti iskor a 4-6, 6-4, 6-3, 6-4 iti ay-ayam a nagpaot ti tallo nga oras ken 37 a minuto.
Inbatad ti 10-time Australian Open champion nga ibilangna a maysa daytoy a naisangsangayan a laban.
Gapu iti panagballigina, umas-asidegen a magun-odna ti rekord a 25th grand slam tapno maartapan ni Margaret Court ti Australia.
Iti umuna a set ket nagun-od ti Spanish tennis star ti panagballigi ken napilitan a timmawag ti agtawen iti 37 a ni Djokovic ti medical timeout gapu iti injury iti luppona.
Nagsubli isuna iti second set a nakatali ti benda ti akinkannigid a luppona.
Adda ti naiget a rally ti dua agingga a dimmanon iti maikapat a set ken naan-anayen a nagun-od ni Djokovic ti balligi.
Sumaruno a makasango ni Djokovic iti semifinals ni Alexander Zverev inton Biernes.
