LAOAG CITY – Kinondenar ni Defense Secretary Gilberto Teodoro Gibo Jr. ti China Daily kalpasan ti panangiruarda ti maysa a social media post-da nga iladladawanda dagiti Pilipino kas sunggo mainaig iti arbitral ruling iti West Philippines Sea (WPS).
Segun ken ni Teodoro, ti nadakamat a post ti Chinese state media outlet ket maipagarup mangipakpakita ti panagkita ti Chinese Communist Party (CCP) kadagiti Pilipino.
Nairuar ti kontrobersial a post ti China Daily idi Hulio 10, dua nga aldaw sakbay iti maika-10 nga anibersario ti nagbalin a desision ti Permanent Court of Arbitration a nangbigbig ti takder ti Pilipinas iti Exclusive Economic Zone (EEZ) iti West Philippine Sea.
Mainaig iti daytoy, inrakurak ni Teodoro a ti panangiladawanda kadagiti Pilipino kas sunggo ket maysa a panang-taggibassit ken maysa a propaganda kontra iti Pilipinas.
Kabayatanna, inrakurak met ni Rear Admiral Jay Tarriela, pannakangiwat ti Philippine Coast Guard para iti West Philippine Sea concerns a konkondenarenna ti aniaman a racism.
