LAOAG CITY – Naglikudan ti Ministry of Foreign Affairs ti China nga adda ti pakainaigan ti gobiernoda iti AI-generated video nga inparuk-at ti state-run media outlet a mangiladladawan kadagiti Pilipino kas sunggo kabayatan a babbabalawenna ti 2016 Arbitral Award iti West Philippine Sea (WPS).
Inbatad ni Chinese Foreign Ministry spokesperson Lin Jian nga awan ti komentona iti nasao a video ken inlawlawagna a saan daytoy nga inaramid ti China.
Nupay kasta, inpettengna manen ti nabayagen a takder ti Beijing a saanna a bigbigbigen ti 2016 West Philippine Sea arbitral ruling a para kenkuana ket illegal ken awanan ti bileg.
Kabayatanna, inpaganetget ti Pilipinas iti bileg ti nasao a desision a mangibagbaga nga awan ti legal a pagibasaran ti nalawa a panagtagikua ti China iti pagin-innagawan a kabaybayan.
Immunan a kiniddaw ti Department of Foreign Affairs (DFA) iti state-run media outlet nga ikkaten ti AI-generated video iti social media.
Inladawan ti Department of Foreign Affairs ti video kas racist, makapainsulto ken panangdadael ti dignidad dagiti Pilipino.
