LAOAG CITY – Saan a pabor ni Doctor Alan Taylan iti St. Camillus De Lellis Hospital ditoy ciudad ti Laoag iti plano ti gobierno a a pagbalin a boluntaryo laengen ti panagusar ti face mask kadagiti indoor spaces.
Inlawlawag ni Doctor Taylan a ti panagusar ti face mask ket ado dagiti mabalin a maprebentaran a sakit, saan laeng a ti covid-19 virus.
Segun kenni Taylan, sumagmamano kadagiti sakit a mabalin a maprebentaran babaen iti panagusar ti face mask iti indoor spaces ket ti tuberculosis, bacterial pneumonia, influenza, ken dadduma pay.
Innayon na a saan koma a rumbeng nga agkampante nga awanen ti covid-19 virus gapu ta narigat ti agsakit iti daytoy.
Inpalagip pay ni Doctor Taylan a no bilang umado manen ti kaso ti virus ket amangan no maisubli ti dati a sistema iti panagbiag dagiti tattao a kas idi kangitingitan ti pandemya nga intunda ti covid-19.
