LAOAG CITY – Mangrugin a mangipatungpal ti Department of Energy ti policy application-da seknan iti distribution utility sector.
Segun ken ni Mr. Mario Marasigan, Asst. Secretary ti Department of Energy, mangrugi ita a tawen ket irubuatda ti pannakaipatungpal ti demand side management wenno kasano ti panangmanihar ti kasapulan nga enerhia tapno mairaman iti Philippine Energy Plan maibasar iti panangkonsiderarda ti power outlook kadagiti sumaruno a tawen.
Inbatadna a babaen iti energy plan ket kalikagumda a maipababa ti 10 a porsiento ti pannakausar ti enerhia a makatulong iti advanced metering infrastructure tapno magun-od daytoy.
Kunana a kasapulan ti kooperasion dagiti electric cooperatives tapno matungpal ti arapaap a makainot ti enerhia.
Mainaig iti daytoy, inpakaammona a mangiparuk-atda ti advisory para iti pannakaibunong ti development plan ti electric vehicle infrastructure development program.
Innayonna nga inton 2040 ket kalikagumda ti 10% a pannakaipangato ti bilang dagiti electric vehicle ken 50% inton 2050.
