LAOAG CITY – Inrakurak ti Department of Energy (DOE) nga agsagsaganada ti baro a pagannurotan tapno pagbalinen a nalaka ken naalisto ti pannakainstolar ti solar panels ken battery storage systems kadagiti umili.
Segun ken ni Energy Secretary Sharon Garin a gagem daytoy nga makissayan dagiti kasapulan a permit ken proseso para kadagiti pamilia a kalikagumda ti agusar ti solar energy para iti bukod a konsumo ken saan a tapno mailako ti kuryente iti distribution utility.
Kunana pay a namnamaen nga mairuar ti nasao a pagannurotan iti uneg ti maysa a bulan.
Kageddan na daytoy ti kiddaw ni Presidente Ferdinand Marcos Jr. iti Kongreso iti maikalima nga State of the Nation Address-na ti insigida a pannakaipila ti Sariling Kuryente Act.
Basar iti Presidente, gagem daytoy a pagbalinen a simple, nalaka ken alisto a pannakainstolar ti solar panels ken battery storage systems kadagiti pagtaengan tapno makatulong iti panangibaba ti gastos iti kuryente dagiti umili.
Kabayatanna, inbatad ti Department of Energy (DOE) a ti baro a pagannurotan ket maiyataday iti gagem ti Sariling Kuryente Act a makissayan ti red tape ken mapaalisto ti panagusar ti renewable energy kadagiti pagtaengan.
