LAOAG CITY – Inpasigurado ni Finance Secretary Ralph Recto a tamingen ti opisinana ti pannakalapped ti pannakailako dagiti illegal a vape products iti merkado.
Iti naangay a panagtataripnong a kauduana ti Japan Tobacco International (JTI) General Manager John Freda ken sumagmamano a nangato nga opisial ti kompania, napagsasaritaan dagiti wagas tapnu maiparit ti panaglako ti tobacco ken mangbukel iti regulasion kadagiti produkto a vape.
Segun ken ni Generral Manager Freda, nakasaganadan a makipagtrabaho iti Department of Finance (DOF) iti panangbukelda iti polisia tapno saan a mailako dagiti illegal a vape products.
Nakasagana met ti Japanese company a mangsuporta iti health agenda ken revenue collection efforts ti gobierno.
Immuna nga inwaragawag ni Recto a suportana iti Department of Trade and Industry a temporario a masuspende ti amin nga online selling dagiti vape products no sadinno kayatna a siguraduen a natalged, ken umiso ti pannakabayad ken pannakakolekta dagiti buis.
