LAOAG CITY – Agtipon ti pwersa ti Department of Health, Food and Drugs Administration ken Professional Regulation Commission (PRC) ti agimbestigar iti maipagarop nga unethical practices ti local pharmaceutical company a patpatarayen dagiti physician.
Mainaig iti daytoy, nagtulag ti Department of Health iti babaen ti public health ethics committee, Food and Drugs Administration ken Professional Regulation Commission a mangbukel ti maysa a joint committee for investigation (JCI) no sadinno nga inimbitaran da pay ti Securities and Exchange Commission.
Segun iti Department of Health, tumulong ti mabukel a komite a makissayan ti redundancy iti isyu ken mapaalisto ti due process requirements mainaig iti ado nga alegasyon a naidasar iti panagdengngeg ti Senado tapno masigurado a maprotehiran ti integridad ti medical profession idinto a mapagsungbat dagiti mapaneknekan a naglabsing iti linteg, pagannurutan ken regulasyon.
Alaen pay ti komite ti inputs ken komento ti professional bodies kas ti Philippine Medical Association (PMA), Philippine Pharmacists Association ken Philippine Hospital Association (PHA).
Agbirbiruk pay ti possible a mekanismo ti komite tapno maprotehiran dagiti whistleblower tapno makaipaay dagitoy ti impormasyon ken ebidensiya.
Immunan nga inbutaktak ni Senador Jinggoy Estrada nga adda ti maipagarop a pannakainaig ti nasao a pharmaceutical company iti multi-level marketing scheme no sadinno a rumrumuar a nangrugi ti operasyon da idi 2006 ken agrecrecruit dagiti doktor imbes a dagiti medical representatives tapno irekomendar dagiti produkto da kadagiti pasyente kasukat ti dakkel a komisyon ken agkakabalor nga insentibo a nalawag a panaglabsing iti ethical principles da.
Kabayatanna, ginutigot ti Department of Health ti publiko kangrunaan na dagiti adda ti impormasyon na a mabalin a makatulong iti imbestigasyon a tumawag laeng iti Food and Drud Administration Field Regulatory Operations Office.
