LAOAG CITY – Nagballaag ti Department of Health iti publiko kalpasan ti pannakatay ti maysa nga innem a bolan na paylaeng a maladaga gapu iti heat stroke.
Inpaganetget ti Department of Health a masapol a bantayan a naimbag dagiti nagannak dagiti annakda.
Kuna ni Department of Health Assistant Secretary ken Spokesperson Albert Domingo, possible ti nasao a report a pannakatay ti maladaga gapu iti heat stroke iti baet ti nakaro a kinabara ti panawen a mapaspasaran ti kaadoan a lugar iti intero a pagilian.
Nadakamat na pay dagiti potensyal a makaigapu ti panagsardeng ti panaganges wenno pangrugyanan ti respiratory failure.
Naibaga pay ni Domingo ti ado a rason a mabalin a mangitunda ti pannakapaay a makaanges a pakarwen ti nakaro a kinabara ti panawen.
Segun ken ni Domingo, dagiti ubbing ken nataengan ti masansan a tamaan ti heatstroke.
Gapu iti daytoy, binalakadan ni Domingo dagiti nagannak a bantayan ti panaganges ti anak a maladaga.
Nagpalagip pay ni Domingo a saan a nasayaat ti sobra a kinapartak ken nabayag a panaganges, ken no mapasamak daytoy ket mapan agpakita a dagus iti doktor.
