LAOAG CITY – Nagpalagip ti Department of Health (DOH) iti publiko nga agbalin a naridam ken agannad kontra kadagiti sakit a masansan a ngumatngato ti kaso tunggal adda ti panagtutudo pakairamanan ti water-borne diseases, influenza-like illnesses, leptospirosis ken dengue wenno ti maaw-awagan a “W.I.L.D.” diseases.
Inbatad ni Department of Health spokesperson Assistant Secretary Albert Domingo a napateg nga insigida nga agpakonsultar iti kaasitgan nga health center dagiti tattao a nalayos tapno makaliklik iti posible a komplikasion iti salun-at.
Kagiddan iti daytoy, ilunglungalong manen ti Department of Health ti kampania a “4Ts” kontra iti dengue tapno malappedan ti panagadu ti lamok a mangitunda ti sakit.
Karaman iti kampania ti Taob wenno ti panagbaliktad dagiti pagikabilan a mabalin a pakaurnongan ti danum; Taktak, wenno panangikkat kadagiti naurnong a danum kadagiti banag a mabalin a pagbalayan ti lamok; Tuyo, wenno panagpatalinaed a namaga iti aglawlaw iti babaen ti panangikkat dagiti nakatiwangwang a danum; ken Takip, wenno panangkalob kadagiti pagurnongan ti danum tapno saan a pagbalayan dagitoy ti danum.
Inpalagip ti ahensia a masansan a kumagkagat dagiti lamok nga addaan ti dengue manipud alas-6 agingga alas-8 ti bigat ken alas-4 agingga alas-6 ti malem.
