LAOAG CITY – Saan pay nga inkeddeng ti Department of Justice no agapelarda iti pinal a desision ti Muntinlupa City regional trial court a nangdismiss iti kaso a panaglako iti illegal a droga kontra ken ni dati a Senador Leila de Lima.
Segun kenni Justice Assistant Secretary Atty. Mico Clavano, inpabusoy ti ahensia iti panel of prosecutors-da a mangikeddeng iti sumaruno nga addangda mainaig iti nadakmat a kaso.
Mainaig iti daytoy, kanayon nga ipatungpalda ti makunkuna a prosecutorial independence.
Inbatadna a ti nadakamt a kaso ket tinawid ti Justice Department manipud iti dati nga administrasion ni Duterte.
Innayon ni Clavano a narigat ti agapela iti kaso no acquittal ti nagbalin a desision.
Kabayatanna, iti statement ni Justice Secretary Jesus Crispin Remulla, ti sentensia ni Muntinlupa City RTC Branch 206 Presiding Judge Gener Gito iti kaso ni De Lima ket maysa laeng a panangipakita nga adda ti sistema ti hustisia ti pagilian ken agtartrabaho iti sidong ti agdama nga administrasion.
Nupay kasta, respetuen ti sekretario ti desision ti korte ket kinunana a pammaneknek met daytoy iti kinapatas ken efficiency ti sistema ti hustisia ditoy pagilian.
