LAOAG CITY – Nangisayangkat ti Department of Labor and Employment ti Trabaho Agad, Kalayaan Job Fair kagiddan iti pannakaobserbar ti maika-128 nga anibersario ti Independence Day.
Segun ken ni Ms. Janelyn Martin, Provincial Director ti Department of Labor and Employment, adda ti 26 nga ahensia no sadinno 24 ti local employers ken dua ti overseas employers ti nakipaset iti aktibidad.
Inbatadna a kabinnuligda ti Department of Social Welfare and Development ken 2nd District Congressional Office.
Inlawlawagna nga adda ti ididiaya ti Department of Social Welfare and Development nga employment assistance para kadagiti ma-hired on the spot nga aplikante.
Kabayatanna, inpakaammo ni Martin nga umabot iti 3.1 milyon ti naiparuk-at a pundo babaen ti DOLE Integrated Livelihood Program no sadinno a dagiti benepisiario ket manipud iti pito nga asosasion a bukbuklen ti 198 a benepisiario manipud iti ili ti Paoay, Marcos, Badoc, San Nicolas, Currimao ken iti siudad ti Batac.
Kunana a dagitoy dagiti maibilang a disadvantaged informal sector workers a maipangpangruna a maasistiran iti nasao a programa.
Innayonna a babaen iti daytoy ket adda ti pangalaan dagiti maseknan a benepisiario ti paggastoanda iti inaldaw-aldaw a panagbiag dagitoy.
