LAOAG CITY – Pinalagipan ti Department of Labor and Employment (DOLE) dagiti establishimento nga adda ti pakainaigan na iti manufacture, distribution ken panaglako kadagiti paputok a sumurot iti occupational safety and health (OSH) standards tapno maprebentaran ti workplace mishaps.
Iti Labor Advisory 18, series of 2025 binilin ni Labor Secretary Bienvenido Laguesma dagiti regional offices tapno mamonitor ti panagsuort dagiti pasdek nga agar-aramid wenno aglaklako iti paputok.
Daytoy ket babaen iti koordinasyon iti Bureau of Fire Protection (BFP), Philippine National Police (PNP), ken local government units.
Nabilin pay dagiti DOLE regional directors nga agisubmitir iti listaan dagiti mamonitor da a pyrotechnics establishments iti Bureau of Working Conditions (BWC) sakbay wenno intono January 15, 2026.
Maipalagip nga idi Oktubre, dua ti natay ken lima ti nasugatan kalpasan a bimtak ti illegal fireworks factory idiay Norzagaray, Bulacan.
Nangisyu ni Laguesma ti labor advisory sakbay ti Yuletide holidays, nangruna ket agus-usar dagiti Pilipino iti paputok no baro a tawen.
Idi December 2024, inbatad ti Department of Trade and Industry (DTI) a 14 licensed manufacturers nga otorisado nga agaramid ken agsuplay ti paputok iti pagilyan.
