LAOAG CITY – Inlawlawag ni Department of Public Works Highways Secretary Vince Dizon no apay a ‘plunder case’ ti rekomendasyon da a maipila kontra kenni dati a House Speaker Martin Romualdez iti insubmitir da a baro a referral iti Office of the Ombudsman.
Segun kenni Dizon, patienda a dagiti dokumento nga insubmitirda iti Ombudsman ket natibker a pagibasaran tapno agtignay daytoy iti maikadua a referral da.
Karaman kadagiti mapapati a napigsa a pagibasaran iti rekomendasion ket dagiti kontrata manipud kadagiti proyekto a nakitaan kadagiti anomalia, ken dagiti sworn statements.
Inbatad na nga adda iti Ombudsman ti respondibilidad no kasano a maituloy ti joint ‘referral’ ti departamento ken ti Independent Commission for Infrastructure.
Inpasiguradona nga agtultuloy ti pannakitinnulong da iti Ombudsman iti maisayangkat nga imbestigasion mainaig iti anomalya dagiti flood control projects.
Basar iti rekomendasion ti departamento ken ti komision, inrekomendarda a mapilaan da dati a House Speaker Martin Romualdez ken dati nga Ako Bicol Party-list Rep. Zaldy Co iti plunder, graft, ken direct bribery.
Inadmitir ni Public Works Secretary Vince Dizon a maganatan ti publiko a mapagsungbat dagiti nairaman iti isyu.
