LAOAG CITY – Naiget a naglikudan ni Department of Public Works and Highways (DPWH) Secretary Manuel Bonoan ti agwarwaras nga alegasion iti social media a maipagarup nga innem a kongresista ti nakaala ti P800 bilyon a balor dagiti proyekto para iti flood control project.
Iti panagatendar ti sekretario iti panagdengngeg ti House Committee on Public Accounts, inawagan ni Bonoan ti nasao a pammabasol kas “preposterous” wenno nakakatkatawa ken awan ti pangibasaran iti panangtalantan kadagiti programa ti ahensia.
Dinakamat ni Senior Deputy Speaker David “Jay-jay” Suarez ti isyu iti maysa a post iti online a mangibagbaga a maipagarup nga adda dagiti kongresista ti nangala ti pundo para iti bukudda nga interes.
Gapu iti daytoy, sinaludsod ni Ako Bicol Rep. Alfredo Garbin Jr. ni Bonoan no adda ti kastoy a nailatang a maipatpatungpal idinto a ti insungbat ni Bonoan ket awan ti kastoy nga specific a budget allocation dagit innem nga agpanpanday linteg.
Inbatad ni Committee Chair ken Bicol Saro Party-list Rep. Terry Ridon a saan nga aggapu iti lehitimo a media outlet ti alegasion no diket manipud laeng iti maysa a blog post iti Facebook.
Inpetteng ni Suarez a seryoso ti Kamara iti panagsango ti isyu nangruna ket paset daytoy ti responsibilidadda a bantayan ti pananggastos iti imprastraktura kas sungbat iti panawagan ni Presidente Ferdinand Marcos Jr. iti State of the Nation Address wenno SONA-na.
Kuna ni Suarez a saan a palubusan ti Kongreso a dadaelen ti saan nga husto nga impormasion ti talek ti publiko kadagiti institusion.
Ti panagdengngeg ket paset ti pormal a panangtingiting ti Kamara kadagiti proyekto ti flood control ken drainage systems iti babaen ti Department of Public Works and Highways Unified Project Management Office – Flood Control Cluster.
Daytoy ket maipatpatungpal kas paset iti nalawa a panaglayos kadagiti nagduduma a paset ti pagilian a mangipasimudaag iti kinapateg iti kinaurnos, epektibo ken napudno a pannakaplano kadagiti imprastraktura.
Banbantayan dagiti agpanpanday linteg iti Kamara ti performance, panagusar ti pundo ken dagiti mekanismo ti oversight kas maiyallubog iti panawagan ti Presidente a lippasen dagiti “ghost projects,” ken nababa a kalidad ti trabaho kadagiti proyekto ti gobierno.
