LAOAG CITY – Imposible dagiti akusasion ni dati nga Ako Bicol Partylist Rep. Zaldy Co a maipagarup nga inbilin isuna ni Presidente Ferdinand Marcos Jr. a mangiserrek ti bicameral conference committee ti P100 bilyon a gatad ti proyekto iti 2025 National Budget.
Inbatad ni Department of Public Works and Highways (DPWH) Secretary Vince Dizon, awan ti kredibilidad ni Co nangruna ket immuna daytoy a timmalaw ditoy pagilian iti baet ti nabara nga isyu.
Kunana a narigat a patien nangruna ket mismo ti Presidente ti nangibilin nga imbestigaran daytoy.
Kabayatanna, immunan nga inrakurak ni Senador Ping Lacson a Chairman ti Senate Blue Ribbon Committee (BRC) nga awan ti probative value ti salaysay ni Co gapu ta saanna daytoy a sinapataan.
Agatap ti opisial no apay iti bicam pay nga ipasingit ti proyekto uray ad-adda a kabaelan nga aramiden iti National Expenditure Program (NEP).
Maipalagip nga inpakaammo ti Department of Justice (DOJ) a saanda a mabalin a mangiwayat ti bukudda nga imbestigasion gapu laeng kadagiti inbutaktak ni Co ken kasapulan nga adda ti mangipila nga umuna kadakuada ti reklamo.
