LAOAG CITY – Pabor ni Dr.Alan Taylan ti St. Camillus De Lellis Hospital a ti inlungalong ni Finance Secretary Ralph Recto mai-ban ti panagilako ti vape ditoy pagilyan gapu ta narisgo daytoy iti salun-at.
Inlawlawag ni Dr.Taylan a ti vape adda met laeng nicotine na daytoy no sadinno nga apektaran na met laeng ti bara, panunot wenno memorya ken mabalin a mangitunda ti pannaka-adik.
Malaksid iti dayta ket mabalin pay a makapasar ti maysa nga indibidual nga agus-usar ti vape ti panagsakit ti buksit, panagsarwa ken kadagiti cardiovascular disease gapu iti chemical a linaon ti vape.
Segun ken ni Dr. Taylan narisgo pay daytoy iti salun-at dagiti ubbing nangruna ket naruay dagiti agus-usar ti vape nga agtawen ti 15 agpababa.
Malaksid kadagiti agtutubo ket marisgo pay daytoy kadagiti nataengan.
Impaakaammo na pay a saan laeng a dagiti agus-usar ti vape wenno agsigsigarilyo ti makaala ti sakit sipod ta dakkel pay ti risgo na daytoy kadagiti makaang-angot ken makalanglang-ab iti asok na.
Kabayatanna, binalakadan ni Dr. Taylan ti publiko nangruna dagiti agtutubo a saan da nga agus-usar iti aniaman a nicotine products.
