LAOAG CITY – Natay ti maysa a driver ni Vice Mayor Aldrin Garvida idiay Nueva Era, Ilocos Norte kalpasan a natennag iti derraas ti iturturong na a dump truck iti paset ti Barangay Cabittaoran iti nasao nga ili.
Nabigbig ti biktima a ni Melecio Balintec, 59, naasawaan ken residente iti Barangay Palyas idiay ili ti Vintar.
Segun iti imbestigasyon ti PNP iti ili ti Nueva Era, bayat a sumangsang-at iti nasao a lugar ti dump truck ket napukawan ti kontrol isut gapu na a nagatras ket natennag iti derraas.
Naamoan a ti nasao a dump truck a kukua ni Bise Mayor Garvida ket nagkarga kadagiti batbato idi mapasamak iti aksidente.
Naitaray ti biktima iti Rural Health Unit iti ili ti Nueva Era ngem naideklara a dead on arrival gapu kadagiti sinagaba na a sugsugat iti nagduduma a paset ti bagi na.
