LAOAG CITY – Winaya-wayaanen ti Philippine National Police iti ili ti Currimao ti driver ti kotse kalpasan a natay ti kinadinnungpar na a nakalugan ti motorsiklo iti napasamak a road crash incident iti national highway a sakupen ti Barangay Pias Sur iti nasao nga ili.
Segun ken ni P/Cpt. Melvin Soriano, Chief of Police iti ili ti Currimao, kalpasan ti 18 nga oras a reglementary period, ket pormal a nawaya-wayaan ti driver ti kotse.
Ngem nu pay kasta, manamnama nga agsarita dagiti pamilya dagiti maseknan apaman a maitabon ti biktima iti laksid nga adda immunan a saritaan.
Imun-una ngem iti daytoy, nabigbig ti driver ti motorsiklo a ni James Baltazar, agtawen ti 33, residente iti Barangay 20, GS Rosario Poblacion Carranglan, Nueva Ecija idinto a ti nangiturong ti kotse ket ni James Clyde Salades, residente iti Sinait, Ilocos Sur.
Maipalagip a napasamak ti fatal road crash incident iti Barangay Pias Sur, iti ili ti Currimao apaman nga agturturong nga agpa-amianan ti nakamotorsiklo ken agpa-abagatan a direksyon ti nakakotse ket dita a kellaat a nagdinnungpar da.
Insigida a naitaray iti balay pagagasan ti biktima ngem naideklara a dead-on-arrival.
