LAOAG CITY – Temporario a winaya-wayaan ti Piddig Municipal Police Station ti driver ti kotse a nakadungpar iti maysa a criminology graduate iti ili ti Piddig.
Segun ken ni P/Maj. Kristian Lee Badua, Hepe ti Piddig Municipal Police Station, saanda a mabalin a pagtalinaeden daytoy iti kuerpo ti pulisia nangruna ket awan pay ti naipila a reklamo ken napagsasaritaan dagiti partido a karaman iti desgrasia.
Inbatadna a kalpasan ti pannakaitabon ti bangkay ket ditoy a manamnama ti panagsangoda.
Kunana a no addanto ti kalikagum ti pamilia ti pimmusay a mangipila ti kaso ket insigida nga isaganada dagiti dokumento a kasapulan ken mabalin a sumango daytoy ti kaso a Reckless Imprupence Resulting to Homicide.
Nupay kasta, inlawlawagna a basar kadagiti naglabas a kaso a naiggemanda ket pabayadanda lattan dagiti balor ti perdision ken awanen ti kaso a maipila.
Maipalagip a pimmusay ti maysa a criminology graduate iti Barangay Sucsucquen iti ili ti Piddig kalpasan a dimmungpar daytoy iti sumansanod a kotse manipud iti maysa a repair shop.
Naammoan a ti driver ti kotse ket maysa a business owner ken ti nakamotorsiklo ket criminology graduate a manamnama koma a mangala ti board examination-na ken anak ti maysa a pulis.
Rumrummuar a napaspas ti panagpataray ti nakamotosiklo basar iti nagbalin nga impact ti aksidente.
Kabayatanna, naitaray ti criminology graduate iti ospital ngem naideklarar daytoy a dead on arrival.
