LAOAG CITY – Nagtalinaed ti indibidual a nagmaneho ti kurong-kurong iti Mariano Marcos Memorial Hospital and Medical Center iti siudad ti Batac kalpasan a dinungpar a dinungpar ti maysa a kotse iti Bgry. 1 San Francisco iti ili ti San Nicolas.
Basar iti Philippine National Police iti nasao nga ili, nabigbig ti driver ti kotse a ni Kierven John Ancheta, agtawen ti 31, naasawaan ken residente iti Brgy. Sta. Rosa iti siudad ti Laoag.
Idinto a nabigbig met ti nangiturong ti kurong-kurong a ni Alijandro Palitec, agtawen ti 29 ken residente iti Brgy. Sabang, Cabugao, Ilocos Sur.
Maibasar iti naisayangkat nga imbestigasion, kabayatan a dumaldalyasat ti kurong-kurong nga agpa-amianan ket kellaat a dinungpar daytoy ti kotse nga agpa-abagatan.
Gapu iti daytoy, nagsagaba ti sugat iti nagduduma a paset ti bagi ti driver ti kurong-kurong idinto a nasugat met iti ulo ti nangiturong ti kotse iti Governor Roque B. Ablan Sr. Memorial Hospital babaen iti nagresponde a kameng ti Bureau of Fire Protection ken Municipal Health Office iti ili ti San Nicolas.
Naammoan nga adda pay ti nairaman a nadungpar ti kotse a nakatakder laeng iti lugar a nakapasamakan ti insidente.
Kabayatanna, naduktalan dagiti otoridad a nabartek ti driver ti kotse idi napasamak ti desgrasia.
