LAOAG CITY – Natiliw ti maysa a shuttle van driver ken maibilang a drug courier babaen iti inyuswat nga operasyon ti PNP ken PDEU iti paset ti Public Cemetery iti Barangay 10 iti ili ti Bacarra.
Nabigbig ti suspek a ni Marshan Baracao, agtawen ti 42 ken residente iti Barangay 27 ditoy ciudad ti Laoag.
Segun kenni Police Lt. Jackson Sugayen, ti mangidadaulo ti PDEU, itay bigat ket nagturong iti opisina da dagiti kameng ti PDEA a nangipakammo nga adda ti impormasyon da seknan iti panagideliver ti iligal a droga iti nasao nga ili.
Inbatad na a nangbukel da ti grupo tapno mangkumpirmar iti impormasyon ken bayat nga adda da iti lugar ken simmangpet ti suspek a nakalugan ti van ken apaman a nakababa ket inyawat na ti maipagarop a droga iti maysa kadagiti operatiba.
Kunana a nagtaray ti suspek nga agsubli kuma iti van ngem kinamat dagiti pulis rason a balligi a nagammatan da daytoy.
Mainaig iti daytoy, inbatad ni Sugayen a ni Baracao ket konektado kadagiti ummunan a natiliw wenno miembro iti Reyed Drug group a na-nuetralize dagiti otoridad.
Naamoan a ni Baracao ket karaman iti Regional Target List.
Nakumpiskar kenni Baracao ti uppat a sachet a naglaon ti maipagarop a shabu, cellphone, caliber 22 a paltog nga addaan ti uppat a bala pakairamanan ti van a nagluganan na.
Ummunan nga inbatad ni Baracao a naggapo isuna iti ili ti Pasuquin gapo ta napan na intulod ti maysa kadagiti empleado ti BPO company ken idi agawiden ken nasada iti checkpoint ken naibaga kenkuana nga adda ti nadungpar na.
Inpalgak na nga idi bimmaba isuna ket maipagarop a simrek dagiti otoridad ti van a nagluganan na ken saanen nga isuna ti nagmaneho agingga a nakadanon da iti kamposanto.
Inakusaran na pay a maipagarop a inabkabil isuna dagiti pulis.
Innayon na a saan a pulos nagusar ti iligal a droga.
