LAOAG CITY – Nangiwayat ti tignay protesta ti sumagmamano a grupo iti batog ti Camp Aguinaldo ita nga aldaw tapno kondenaren ti Balikatan Exercise.
Inatendaran daytoy dagiti grupo a Bagong Alyansang Makabayan, Kilusang Mayo Uno, Alliance of Concerned Teachers ken Kilusang Magbubukid ng Pilipinas.
Basar kadagiti nangiwayat ti tignay protesta, us-usaren laeng ti Estados Unidos ti Pilipinas kas training ken staging ground para iti military power projection daytoy.
Dinakamatda a ti panagpaputok ti Tomahawk, panagusar ti live fire weapons ken panangikabil ti missile idiay Batanes ket mangitunda ti risgo kadagiti komunidad.
Naammoan nga ita ti closing ceremony ti nasao a panagsanay a nangrugi idi Abril 20 ken nakipartisiparan ti sumurok 17 a ribu a suldado manipud iti Pilipinas, Estados Unidos, Australia, Canada, France, Japan ken New Zealand.
