LAOAG CITY – Agsagsaganan ti Philippine National Police dagiti kasapulan nga security measure para iti dua nga aldaw a transport strike ita nga aldaw, Setiembre 14 agingga inton bigat, Setiembre 15 nga inyuswat ti grupo a MANIBELA kas protesta iti agtultuloy a panagngato ti presio ti langis.
Segun ken ni Philippine National Police chief Gen. Jose Melencio Nartatez Jr. a nakaalerto dagiti police unit kadagiti lugar a manamnama a pagigimongan dagiti agprotesta pakairamaan ti paset ti Philcoa iti Quezon City.
Dinutokan pay dagiti police chief ken territorial units a makikoordinar kadagiti local a gobierno ken dadduma pay nga ahensia ti gobierno tapno mapagtalinaed ti seguridad ken maurnos ti crowd management.
Malaksid iti daytoy, nangbukel ti Philippine National Police ti koordinasion tapno maipaayan ti tulong kadagiti commuter a possible a ma-stranded iti kalsada gapu iti tigil-pasada.
Kuna ni Nartatez a maawatan ti nasional pulis ti kiddaw dagiti transport group no sadinno ket naapektaran pay iti agtultuloy ti panagngato ti presio ti langis dagiti kamengda nga agmanmaneho.
Namnamaen ti Philipine National Police nga agtalinaed a nakappia ken naurnos dagiti maiyuswat a protesta ngem nakasagana dagiti kanayonan a security forces no man adda mapasamak nga emergency wenno dadduma pay nga insidente.
