LAOAG CITY – Natay ti nangiturong ti motorsiklo kalpasan a naidungpar iti puon ti acacia iti Barangay Pias Sur iti ili ti Currimao.
Nabigbig ti biktima a ni Justin Ryan Luiz Aquino, agtawen ti 19 ken ti kinalubbonna a ni Gianni John Rosini, agtawen ti 18 nga agpada a residente dagitoy iti Barangay Quiling Sur iti siudad ti Batac.
Basar iti Currimao Municipal Police Station, kabayatan a dumaldalyasat ti dua a nagkalubbon iti motorsiklo a Yamaha Mio 125 nga agturong nga agpa-abagatan ket kellaat a napukawan ti kontrol ti manibela ti driver ti motorsiklo a nangitunda ti pannakaidungparda iti acacia.
Gapu iti daytoy, nagsagaba ti sugat iti nagduduma a paset ti bagi dagiti dua a biktima ken insigida a naitaray dagitoy iti Mariano Marcos Memorial Hospital and Medical Center iti siudad ti Batac para iti naan-anay a pannakatamingda.
Nupay kasta, naideklarar a dead on arrival babaen ti attending physician ti driver ti motorsiklo.
Mainaig iti daytoy, inadmitir ti kinalubbon ti driver ti motorsiklo nga agpadada a nabartek ken agturongda koma iti ili ti Pinili.
Kabayatanna, naammoan a napaspas ti taray ti motorsiklo idi napasamak ti nasao nga insidente.
